بەبۆنەی هاتنی مانگی پیرۆزی ڕەمەزان و جەژنی رەمەزان، دەزگای روانگە وەك بەشێك لە چالاکییە مرۆییەکانی لە چوارچیوەی سێکتەری لێقەوماوان پێنج هەزار "پارسێڵی خەندە"ی لە سەرانسەری هەرێمی کوردستان دابەشکرد.

​لە رێکەوتی 15ی نیسانی 2023، دەزگای روانگە دەستیکرد بە دابەشکردنی پێنج هەزار سەبەتەی خۆراک لە ژێر ناونیشانی "پارسێلی خەندە" بۆ خێزانە کەم دەرامەتەکانی کە پێویستیان بە هاوکاریە  لە هەرێمی کوردستان و وەك بەرز راگرتنێك بۆ مانگی رەمەزان و جەژنی رەمەزانی پیرۆز. پرۆسەی دابەشکردنەکە بۆ ماوەی چوار ڕۆژ بەردەوام بوو و ئامانجی دابینکردنی ماددەی خۆراکی پێویست بوو بۆ خێزانە کەم دەرامەتەکان. داتا و زانیاری خێزانەکان بە هاوکاری لەگەڵ پارێزگا و ناوەندی هاوبەشی هەماهەنگی قەیرانەکان و بەڕێوەبەرایەتی ئیدارە سەربەخۆکان لە هەر پارێزگایەکدا کۆکرانەوە.

پلانی دابەشکردنەکە بە شێوازێکی ورد داڕێژرا،  بە جۆرێک لە سەنتەری شاری هەولێر 1000  سەبەتە و لە قەزای سۆران 500 سەبەتە دابەشکران. 1000  سەبەتە لە دهۆك و 300 سەبەتە لە زاخۆ دابەشکران. 1000  سەبەتە لە سلێمانی و 300 سەبەتەی دیکە لە دەڤەری ڕاپەرین دابەشکران. جگە لەوەش، 600 سەبەتە بۆ هەڵەبجە و 300 سەبەتە بۆ گەرمیان دابینکراون.

هەر سەبەتەیەکی خۆراک کێشی 35 کیلۆگرام بوو و حەوت مادەی خۆراکی پێویستی تێدابوو کە بریتین لە 3 کیس برنج (4.5 کیلۆگرام)، 6 بوتڵ زەیتی خواردن (1 لیتر)، 4 قوتوو دۆشاوی تەماتە (1 کیلۆگرام)، 1 کیس شەکر (5 کیلۆگرام)، 5 کیس چا (200 گرام)، 4 کیس نیسك  (500 گرام)، و 4 کیس فاسۆلیای سپی (500 گرام).

دوای تەواوبوونی پڕۆسەی دابەشکردنەکە، دەزگای روانگە هەڵسەنگاندنێکی وردی ئەنجامدا بۆ هەڵسەنگاندنی کاریگەری و کارایی پرۆسەی دابەشکردنەکە، و دڵنیابوون لەوەی کە دەستپێشخەری "پارسێلی خەندە" بە شێوەیەکی دروست گەیشتووەتە خێزانە خاوەن پێداویستییەکان و توانراوە کەلوپەلی خۆراکی پێویستیان بۆ دابین بکرێت لە مانگی رەمەزان و جەژنی ڕەمەزانی پیرۆزدا.

دەزگای روانگە پابەندە بە گەیاندنی ئەرکی خۆی بۆ باشترکردنی ژیانی کۆمەڵگە لێقەوماوەکان لە سەرانسەری هەرێمی کوردستان و عێراق.