رێوڕەسمی کۆتایی پڕۆژەی (برەوپێدانی مافەکانی لاوان لە شوێنی کار لە عێراق ) لە هۆڵی دەزگای روانگە بە ئامادەبوونی هەریەک لە بەڕێزان ( حسن شێخ علاءالدین) بەڕێوەبەری گشتی جێبەجێکاری دەزگای روانگە و جێگری بەڕێوەبەر، ( فلاح حسن ) سەرۆکی فەرمانگەی ڕێکخراوە ناحکومیەکان لە هەرێمی کوردستان و (احمد سعد ) نوێنەری وەزارەتی وەرزش و لاوان لە حکومەتی عێراق و (ئەختیار حاجی) بەڕێوەبەری سەنتەری ڕاهێنانی پیشەیی سۆران لە هەمان کاتدا نوێنەری وەزارەتی کار و کاروباری کۆمەڵایەتی لە حکومەتی هەرێمی کوردستان، (هیمداد ئومێد) بەڕێوەبەری کار و هەماهەنگی کۆمەڵایەتی لە وەزارەتی کار و کاروباری کۆمەڵایتی لە حکومەتی هەرێمی کوردستان و لایەنە حکومیی  دیکە و رێکخراوە نا حکومییەکان و راوێژکارانی یاسایی و لاوان بەڕێوەچوو.

پڕۆژەی (برەوپێدانی مافەکانی لاوان لە شوێنی کار لە عێراق ) بە هەماهەنگی لەگەڵ ڕێکخراوی کاری نێودەوڵەتی  لە ساڵی 2022 دەستی پێکرد و ماوەی ٢ ساڵ کاری لەسەر کرا و بەردەوام بوو. ئامانجی پرۆژەکە دانانی بناغەیەکی پتەوبوو بۆ مافەکانی لاوان لە شوێنی کار  و ئامادەکردنی ڕەشنووسێک بوو بۆ ئەم بابەتە بە هەماهەنگی لەگەڵ شارەزایان لە پاراستنی مافەکانی لاوان و راوێژکارانی یاسایی لە هەموو پارێزگاکانی هەرێمی کوردستان و عێراق. لە پاش چەند دانیشتنێک لەگەڵ 177  لاو لە کارمەندی کۆمپانیاکان و بێ کار یان خاوەن کۆمپانیاکان و کەسانی پەیوەندی دار لە حکومەت ڕەشنووسێک کە لە ١٢ بابەت پێکهاتبوو ئامادە کرا لەوانە :

Ø     دەروازەی یاسایی کاری عێراقی

Ø     بەربەستەکانی بەردەم کارکردنی گەنجان و کاری شایستە

Ø     کاری بە زۆرەملێ، کارپێکردنی منداڵان و جیاکاری

Ø     مەرجەکانی کار: کاتژمێرەکانی کارکردن، کرێ و مۆڵەت

Ø     سەلامەتی و تەندروستی پیشەیی

Ø     دانوستاندنی بە کۆمەڵ و مافەکانی کرێکاران

Ø     یەکسانی، جیاکاری، توندوتیژی و هەراسانکردن لە شوێنی کار

Ø     مافی دەستگەیشتن بە کار بۆ گەنجانی ئاوارە بەپێی یاسای عێڕاقی

Ø     بیمەی کۆمەڵایەتی

Ø     ماف و ئەرکەکانی خاوەنکار و کرێکاران

Ø     مافە تایبەتەکانی ئافرەت لە شوێنی کاردا

Ø     سەلامەتی دەروونی لە شوێنی کار

پاشان  پێداچوونەوەی  بۆ هەریەک لە بابەتەکان کرا بۆ ڕادەستکردنی بە وەزارەتی کار و کاروباری کۆمەڵایتی حکومەتی هەرێمی کوردستان و وەزارەتی وەرزش و لاوان لە حکومەتی عێراق  .ئەم پرۆژەیەی بە دەر لە ئامادەکردنی ڕەش نووسەکە چەند چالاکیەکی جۆراو جۆری لە خۆ گرتبوو لەوانە، خولێکی راهێنان بۆ راهێنەران و کارمەندان لە بەرێوەبەرایەتی گشتی کار و دەستەبەری کۆمەڵایەتی و سەنتەری راهێنانی پیشەیی، لە هەریەک لە شارەکانی هەولێر و دهۆک و سلێمانی و هەڵەبجە و گەرمیان و ئیدارەی سەربەخۆی سۆران و زاخۆ، هەروەها بەغدا و نەینەوا و لەهەمان کاتدا بەژداری کردن لە پێشانگای هەلی کار لە هەریەک لە  شارەکانی هەولێر و دهۆک بۆ ئاشنا کردنی لاوان بە مافەکانیان لەسەر کار.

لاوان ئێستا و داهاتووی کۆمەڵگەکەمانن، پاراستنی مافەکانیان ئەرکی سەرشانی هەموومانە.

 دەربارەى دەزگاى روانگە

دەزگای روانگە دەزگایەکی ناحکومییە و کۆششدەکات بۆ هێنانەدی جیهانێک کە هەموو تاکێک دەستیبگات بە پەروەردەیەکی جۆری. هەروەها ئەرکی پێشکەشکردنی خزمەتگوزاری و پەرەدان بە توانا و داڕشتنی نەخشەسازی پەیڕەوە، تاوەکو دڵنیابێت لە بەشداری کردنی هەموو کەسێک لە پەروەردەیەکی تەندروست، لە هەمانکاتیشدا گەشە بە بواری فراوانی پەروەردە دەدات لە جیهان بەگشتی و کوردستان و عێراق بەتایبەتی.

بۆ زانیاری زیاتر پەیوەندی بکەن بە:
07508693039