بەرواری ٧ی ئازاری٢٠٢٢ -  دەزگای روانگە لە پارێزگای بەغدا پڕۆژەی خەڵاتەکانی روانگەی بۆ ساڵی نۆیەم لە کۆنگرەیەکی رۆژنامەوانیدا راگەیاند .

رێورەسمەکە بە ئامادەبوونی  بەڕێز عدنان درجال - وەزیری لاوان و وەرزشی عێراق، بەڕێز فارس عیسی - سەرۆکی نوێنەرایەتی حکومەتی هەرێمی کودستان لە باغدا، بەرێز علاء معن - ئەمینداری بەغدا، بەڕێز حسنین الشیخ - راوێژکاری سەرۆك وەزیرانی عێراق بۆ کاروباری پڕۆتۆکۆڵی، و کۆمەڵێك هونەرمەند و چالاکوان و نوێنەرانی رێکخراوی لاوان بەڕێوەچوو. هەروەها لە کاتی رێورەسمەکەدا بڕوانامەی رێزلێنان پێشکەش بە گشت ئەو لایەنانە کرا کە هەماهەنگ و هاوکار بوون لە ئەنجامدانی پڕۆژەکە لە ساڵی ٢٠٢١. 

دەزگای روانگە بەمەبەستی برەودان به توانای لاوان و دۆزینەوەی بەهرە شاراوەکانیان و شکۆفەکردنی هەستی متمانە بەخۆکردن و وەگەڕخستنی کارامەییە هونەریی و ئەدەبیی و زانستییەکانیان بەرهەمی جۆراوجۆری هونەریی و ئەدەبیی و زانستیی ئەو لاوانەی کوردستان  و عیراق وەردەگرێت کەوا تەمەنیان لەنێوان ١٥- ٢٥ ساڵانە، لە بوارەکانی کورتە چیڕۆک)زمانی کوردی)، کورتە چیڕۆک)زمانی عەرەبی)، کورتە فیلم، فۆتۆگرافیی، تاکژەنی میوزیک، داهێنانی زانستیی، هونەری ریسایکلین، وێنەکێشان، دەستپێشخەری کار، هۆنراوە (زمانی کوردی)، هۆنراوە (زمانی عەرەبی)، پڕۆگرامسازی. هەر لاوێکیش بیەوێت بە بەرهەمێکی داهێنراوی خۆی بەشداری ئەو پێشبڕکێیە بکات، دەتوانێت دوای خوێندنەوەی مەرج و رێنماییەکانی تایبەت بە هەر بوارێک لەم بوارانەی سەرەوە بابەتەکەی بنێرێت بۆئەوەی لە رێگەی لیژنەی پسپۆڕەوە هەڵسەنگێندرێت. و دواتریش لە ئاهەنگێکی شایستەدا کە لە تشرینی یەکەمی ٢٠٢٢دا ڕێکدەخرێت، خەڵاتی روانگە دەبەخشرێتە ئەو کەسانەی کە پلەی یەکەم و دووەم و سێیەمی هەر یەک لە بوارەکانیان بەدەست هێناوە.

مەرجە گشتییەکان:

• تەمەنی بەشداربوو دەبێ لەنێوان ١٥ تا ٢٥ ساڵدا بێت (تەنیا بۆ بواری دەستپێشخەری کار دەبێ لە نێوان ١٨ بۆ ٢٥ بێت).
• بەرهەمەکەی نابێ پێشتر لە هیچ شوێنێکی تر بڵاو کرابێتەوە یان نمایشکرابێت، دەبێت بەرهەمی ساڵی ٢٠٢٢ بێت.
• بەشداربوو دەبێت تەنها بە یەک بەرهەم بەشداری بکات.
• هەر کەسێک دانیشتووى هەرێمی کوردستان و عێراق بێت مافی بەشداربوونی هەیە.
• ماوەی پێشکەشکردنی بەرهەم لە ٧/٣/٢٠٢٢ تاکو ١٥/٧/٢٠٢٢ دەبێت.
• بەشداربوو دەبێت ئامادەیی تێدابێت بۆ هەر چاوپێکەوتن و لێکۆلینەوەیەکی لێژنەی هەڵسەنگاندن.
• بەشداربوو دەبێت کۆپی ناسنامە و ژمارەی تەلەفۆن و شوێنی نیشتەجێبوون لەگەڵ بەرهەمەکەی بنێرێت.
• دەزگای روانگە مافى بڵاوکردنەوەی بەرهەمە براوەکانی هەیە و دەتوانێت لە هەر کات و شوێن و کەناڵێکی راگەیاندن بڵاوی بکاتەوە، تەنها بۆ کاری بازرگانی نەبێت.

 بۆ  زانیاری زیاتر سەردانی پڕۆژەی  خەڵاتەکانی روانگە بکەن